Semo sempre nel Liberty,e volessi zontar qualche informazion sul palazzo liberty che xe in Viale, quel del cinema adesso Ambasciatori, prima Supercinema, Principe, Eden... che no ve metto foto perchè lo ga ben illustrado el nostro Zoomy
qua e
anche più sora, se ghe ne parlava, anche a proposito delle statue de Rathmann.
Ben, oltre che el libro sul architettura, anche el novo numero del Archeografo triestino ghe dedica un articolo
Alora, el palazzo i ghe dà el nome dei committenti ,
Viviani - Giberti el xe del 1906 1907 e el xe famoso per esser l'unico palazzo dei grandi palazzi triestini a esser firmado de un
architetto italian, Giuseppe Sommaruga, che xe considerado el pare del liberty italian. El ga fatto un palazzo molto simile a Milan.
Xe proprio de osservar che sto palazzo xe de un per de anni posterior del
Narodni Dom de Fabiani, che xe inveze più stile Secession viennese, ispirado dela scola de Otto Wagner, che preferiva un stile più sobrio: in effetti, el par più moderno! a quell'epoca, come al solito , e come che magari sotto sotto farà qualche forumista ancora adesso, iera un confronto fra el
bel/brutto stile italian e el
bel/brutto stile austriaco, a seconda dele preferenze politico-cultural dele persone
Al de là dele considerazioni de gusti personali, xe de notar alcune informazioni: le statue, i fregi, no xe scolpidi nela piera, come che xe in altri palazzi, ma xe fatti in modo quasi industrial, in "
piera ricostituida" de un atelier
Ambrogio Pirovano. quindi el
Rathmann dovessi aver dado el modello dele do babe, come pur dele altre statue del genere sparse per altri palazzi Liberty.
La facciate laterali no xe del Sommaruga, che ga curado el lato central, ma de un
Arnaldo Barison, el fio del pittor Barison.
El palazzo nassi subito col intenzion, come el Narodni Dom, de aver dentro un teatrin, che qua se ciamava Filodrammatico ( come el altro) e iera previsto per spettacoli polivalenti, el iera anche quel decorado in stile liberty, con un foyer, un bar.. dal 1914 i lo ga cominciado a doprar come cinema.
Nel 1947 la sala vien requisida dei Alleati e restituida nel novembre 1954 in condizioni che i definissi deplorevoli... però el colpo de grazia alla sala Liberty ghe lo ga dado el adeguamento ale norme antincendio za del 1951, per cui la sala e tutta la decorazion xe andade perse e xe stado rifatto più volte come cinema.
E .. i committenti
Viviani e Giberti? qua i libri no disi gnente, se no che poco dopo la costruzion , intorno al 1910, el iera passado a altri proprietari, ma mi posso zontar qualcossa de inedito, visto che el ing Viviani.. iera mio zio Cesare!!!
e xe stado anche per mi una sorpresa, perchè nonna. la cui sorella gaveva appunto sposado sto zio Cesare che mi go arivado a conosser, no me gaveva ditto gnente: savevo che el iera ingegner, che el gaveva un socio e che la vedova de Giberti vegniva spesso a trovar nona: per cui posso zontarve un'imagine del primo proprietario-committente e credo anche costruttor del palazzo: ecove
zia Alice e zio Cesare più o meno a quell'epoca, del mio solito archivio familiar
(una coppia assai affiatada, i xe morti piuttosto veci nei primi anni 60, co ela se ga malado, lu ghe ga ciapado anche mal e el la ga seguida nela tomba entro un mese: tomba che xe tuttora qua a s Anna)