Ciancele ha scritto:I cine indove che andavo mi de picio iera el cine Stela, sul canton de via Felice Venezian con Cavana. Chisa quando i lo ga serà e i ga fato un spaceto (spaccio vini). El cinema Savoia, drio l’albergo, el cine Radio, tra via dela Vale e via S. Michele, dove che xe la Rotonda. E el Venesia (cine Venezia). El cine verzeva (apriva) ale do e noi putei ierimo là za ala una a guantarse pa’ la cluca (trad.: per essere i primi ad entrare). Qua parlo dei ani prima dela guera e za ‘lora el iera un bigoncio. I fioi pagava 55 centesimi, adulti 80. Figurarse ai tempi che scrivi Sum Culex. Dopo la guera no son andà più in questi cine, perché lavoravo e gavevo qualche soldo. Co’ gavevimo qualche centesimo de più (una lira al Rex (Viale), Regina o Filodramatico) andaimo in questi cine. Durante la guera bisognava ogni tanto scampar fora per via de l’alarme. Ma no xe mai cascà bombe. I film iera de Risolini e altre robe che i gaveva in archivio. Uno dei pochi film che me ricordo, iera Luciano Serra pilota con Amedeo Nazzari. Semo andai a vederlo perché una parte de comparsa gaveva el nostro amico zio Nito (Benito), classe ’19 che fazeva rocia in Val Rosandra con Comici. El ga dimostrado la discesa in ghiaion.
El cine VIALE sul canton co la via Polonio, fin la fine dela guera se ciamava REALE e no REX, el gaveva do schermi e le poltrone iera divise da un tendon scuro.
Me ricordo anche del cine VITTORIA che iera in via sete fontane angolo Donadoni e in ista iera anca el cine al aperto.
In aquedoto, visavì el Reale ma un poco più in zo iera el cine AZZURRO.
El cine Savoia per la epurasion dopo la guera ga combià nome in ABBAZIA
I cine al aperto che me ricordo iera la ARENA DIANA in via Revoltella (la ghe go dado el primo baso a mia molie), la ARENA DEI FIORI in via ghirlandaio.
A san Giovanni ghe ne iera do, uno dela parochia, drio la rimesa del tran e uno nel zardine dela casa del popolo dove adeso xe la palestra dela Libertas.
Un dei do se ciamava SECOLO ma no saveria dir qual.
Co me pien in amente altri cine, farò un altro post
In viale D'annunzio iera el cine BUFFALO BILL, ma credo de no averlo mai visto, ma solo i me ga contà.
El iera sul canton de via rafineria dove iera una volta la feramenta Pauletta prima che i lo spostasi nela casa nova fata dove iera el garas dela SEA.
El cine MASSIMO iera dove fin do ani fa iera la Upim de bariera.
El cine REGINA che dopo se ciamava ALABARDA iera la de le coperative de bariera.
El cine IMPERO iera la dela botega Center casa de via Gatteri
El MODERNO iera al posto dela coperativa de san Giacomo che i ga serà da un ano.
El IDEALE iera in campo san Giacomo al posto dela Cassa de risparmio