Cese catoliche: una richiesta

[macondo]

Baba gaveva verto un topico su la ciesa de San Lorenzo a Servola ma la gaveva messo solo due foto

No saria el caso che se zoom se trovasi de quele parti el podesi completar el 'servizio fotografico'?
E magari za che el xe de quele parti el podessi far anca qualche foto de Servola cominciando de la scola de Ezio de Marchi, el bar sportivo, la vecia farmacia, via del Pane Bianco ecc ecc e magari terminando con via Giardini, l'oratorio e la discesa per andar zo in Risiera...

Grassie!!!!

[babatriestina]

Baba gaveva verto un topico su la ciesa de San Lorenzo a Servola ma la gaveva messo solo due foto

No saria el caso che se zoom se trovasi de quele parti el podesi completar el 'servizio fotografico'?

al de là che le foto iera 6, posso cominciar a zontar quel che go. Purtroppo no me movo ancora bastanza per andar a zavattar a Servola, zona che per mi xe sempre stada lontanissima e che xe come un'avventura andarghe perchè xe per mi tutto novo. Magari qualchedun altro ga l'occasion de andarghe..

[sum culex]

No saria el caso che se zoom se trovasi de quele parti el podesi completar el 'servizio fotografico'?

De la cesa de San Lorenzo go za un poche de foto che meterò quanto prima anche se babaTS le ga za messe e in parte sarà doppioni (continua la sfida zoom contro zoom); per el resto de Servola, come che te ga dito nona picia, gabi un poco de pasienza: cole temperature che gavemo in sti giorni no me la sento de andar tanto in giro. Cossa te vol: son vecio marantigo
ciao
sum culex

[babatriestina]

me zonto qua, e fazo un sugerimento sule cese cattoliche: le xe messe tute con el nome del santo che le xe dedicade, ma nel parlar comun nissun le ciama cussì o no i sa: podessimo zontarghe nel titolo un cenno su dove che le xe? per esempio S Pasquale Baylon- in Villa Revoltella.. o lassemo cussì che chi che leggi lo ciapi come un quiz e ghe vegni la voia de leger el post per saver dove che le xe?

[Nona Picia]

Poderia esser una bona ideadar le indicazioni, sentimo cossa che disi i altri.

[sum culex]

Veco o no vecio, marantigo o no marantigo, ieri me son stufà de spetar el fresco e son andà a farme un giro de foto. Son andà fora de casa al 10:15 de matina e son tornà a casa ale 14:40. Cossa go fato? Son andà col bus fin là del Burlo e go fotografà la cesa dela Madonna del Rosario del'Istituto Teresian, dopo zo per via del'Istria traverso el ponte de via dei Soncini fin al Nr.30 a fotografar la cesa dela Madonna della Salute (go dovù spetar parecchio tempo che finissi la messa), po me son fato tuta la via Soncini fin Servola. Go continuà zo per la via dei Giaredini fin in fondo (go sbaglia scola: go fotografà la Damiano Chiesa e no quela che voleva Macondo: pasienza). Sta strada finissi contro la superstrada. Bisogna tornar indrio anche se xè salita. Po, a destra zò per la via del Ponticello fin in Valmaura proprio soto la grande viabilità. Qua go fato un ris'cio: per fotogtafar qualcossa dela ferriera son andà a pie su pel racordo rente el gurdrail fin in autostrada anche se no se dovessi e dopo zo in via Valmaura e in su per la salita Ratto della Pileria denovo fin Servola dove che go ciapà el bus per tornar casa. Gavevo un poco de mal de testa per via del sol ma iero sodisfato per gaver fato foto e zercà de contentar Macondo, anche se solo in parte. No conossendo Servola no savevo dove che se trova tute quele robe che el ga domandà e go fotografà a ocio quel che a mio giudizio me pareva più interessante (spero, Macondo, che te sarà contento lostesso). Adesso devo terminar de meterle in ordine e presto ve le farò veder.
ciao
sum culex

[macondo]

Tropo bon, zoomy

Ancora tante grazie!!!

[dcobau]

Poderia esser una bona ideadar le indicazioni, sentimo cossa che disi i altri.

diria (e come al solito parlo per quei che xe via de Ts da anni) che le indicazioni saria sai utili come anche una foto del davanti un poco distante, tipo come S Giacomo/S Giusto/S Antonio in modo che se podesi farse un'idea de dove che le xe (specialmente le nove)

saluti

Dave

[sum culex]

E magari za che el xe de quele parti el podessi far anca qualche foto de Servola cominciando de la scola de Ezio de Marchi, el bar sportivo, la vecia farmacia, via del Pane Bianco ecc ecc

Iero tropo procupà de lassar la tua domanda incompleta!!!
Alora sta matina son tornà a Servola: Go girà el vilagio in longo e il largo:
Intanto la Scola De Marchi po Via Bersezio, Via Banelli, Via del Pane Bianco, via San Lorenzo in Selva, la farmacia e forsi l'oratorio, ma el posto ecc., ecc. no lo go trovà de nissuna parte, me son anche informà e nissun me ga savudo dir dove zercarlo. Insieme cola ferriera xè in tuto qualcossa più de zento foto, che logicamente go de scremar: doppioni con pose diverse, foto in sequenza de riunir e cussì avanti. Gabi pasienza, dame el tempo de lavorarle, de sceglierle, ordinarle e ridimensionarle. Co go terminà sto lavorio, te le meto nel 'bucum'.
ciao
zoomy

[macondo]

Speteró con tuta la pasienza de sto mondo