I disi che no'l xe sai comune, ma se vedi che col freddo el se ga calà in città e la foto servi a documentar che lo go visto. Al contrario, el xe sai comune in montagna e siccome lo gavevo fotografà st'estate a Sappada, metto anche quela foto dove che se lo vedi meio, anche se, per la precision, no la doveria star in sto forum (però la me piasi 'ssai).
El nome scientifico xe Phoenicurus ochruros e ghe lo ga dà un che se ciamava Gmelin, che siccome el gaveva un cognome dificile el se ga vendicà e el ghe ga dà anche a sto useleto un nome più dificile ancora del suo .
In inglese el se ciama black redstart, in tedesco, che i devi far sempre le robe più complicade, Hausrotschwanz, in francese Rouge queue noir e in sloven šmarnica.
E siccome volemo esser proprio internazionali
, ve dirò che in furlan el se ciama codarûl e in Carnia ghe xe el sentier del codarûl che va de Sauris a santa Maria Luggau (Austria) e nol xe proprio un sentier facilissimo (3 giorni se gavè le gambe bone, ma dovè anche saver 'ndar ben in montagna e no ver paura). De più sul sentier lo trovè qua.
