A distanza de più de tre anni, su internet se trova qualcosa, ma tuto in tedesco.Stavolta fazo mi una domanda:
Giorni fa el Picolo ga contà, in due articoleti, che qualchedun ga fato ricerche sula difusion del nome de Trieste (e altri del nostro teritorio).
I risultati xe interesanti, tra l’altro finalmente go podù capir come mai el cocolo ator sicilian Leopoldo Trieste gavessi ‘sto cognome asai particolare, per uno del Sud.
Ma me son anche ricordado che tempo fa gavevo fato anche mi una ricerca de questo tipo e che in Germania (quela volta ancora dell’Est) gavevo trovado una cittadina col nome TRIESTEWITZ.
De quel che go capì el xe un posto ‘ssai picio tra Lipsia e Dresda, più che altro un vecio castel trasformado in pension turistica e poche case intorno.
Anche se i nomi de posti che in tedesco i termina in …witz xe tanti, e qualchedun che me vien in mente no iera proprio alegro, sto nome me ga fato sorider. Go zercà, domandà in giro, guardà nei libri, ma nisun me ga spiegà l’origine de sto nome, sicuramente ligado ala nostra zità.
Ghe xe qualche germanista che pol far un poco de luce?
De quel che poso veder (un link per esempio http://www.schloss-triestewitz.de/index.php?id=20) le origini del posto risali perlomeno al 1251, forsi tra el 900 e el 1100, quando Trieste iera un citadina veramente picia. A sto punto me domando se veramente "Triestewitz" sia ligado a Trieste, roba peraltro sempre posibile, magari la iera stada fondada da un nostro emigrado (sembra comunque che a Triestewitz ghe fosi solo una tore militare, se go capido ben sto tedesco).
Per quel che riguarda la parola "witz" in tedesco, vardando su un vocabolario sembra che la sia usada non solo nel senso de "barzeleta", ma anche de "bello", "buono".