Me xe capità de pasar de quele parti due volte in sti giorni e alora go pensà de meter qualche foto in più de sto palazo, che el saria molto bel (de dentro, come ga mostrà babatriestina el xe ancora belisimo), ma el xe un poco malmeso.
Intanto metemo una foto senza bandiere, cusì a Adler no ghe vien mal de panza e dopo, subito, un'altra de come che lo go resturà mi, a spese mie
, giustandoghe el fregio e reintonacando le colone.
El restauro ghe lo dovevo a mio papà che ga dormì in sofita de sto palazo tra el 46 e el 47: la sua camera de leto iera una branda e, me par de ricordar che ghe pioveva anche dentro.
Torando al palazo, el ga un bel timpano (xe giusto ciamarlo cusì Babatriestina?) in alto, che xe bastanza ben conservà
e questo xe un particolare dela decorazion (qualchedun ne conterà che stile che xe)
Soto al timpano ghe xe una decorazion piutosto malandada. Go meso solo un tocheto che xe bastanza intiero; lo go meso in evidenza s'ciarindo el resto. El motivo del fregio se ripeti più volte.
Sora a tre portoni che xe tre lunette con dei basorilievi; mi no ghe ne go viste altre, me vien el sospeto che le sia andade perse.
Questa xe sula faciata a destra e me par che la mostri una dona che fa de scarpelin. Poderia eser l'alegoria dela "Scultura".
Sempre sula faciata, a sinistra ghe xe una dona che se gioga coi capitei, le colone e un compaso e poderia eser l'alegoria de "l'Architetura".
Sul fianco sinistro del palazo se vedi un terzo basorilievo. Xe una dona con in man un mondo, drio un canocial e per traverso un'ancora. No go idea cosa che la pol rapresentar. Pensavo a l'astronomia, ma l'ancora c'entra poco, o senò la navigazion. Ma anche qua son sicuro che Babatriestina completerà l'opera.
P.S. a ogni bon conto, i mii restauri xe virtuali. No se sa mai che a qualchedun ghe vegnisi el dubio.
... se i me lo regala me lo tegno e son contento ;-D ;-D ;-D ;-D ;-D ;-D
