Me par giusto recuperar questa discusion dal vecio forum, sperando che a qualchedun ghe fazi piacer.
----------------------
Da dcobau on Tue, 08 Oct 2002 03:13
Ciao tuti,
qua i negozi comincia a meter fora la roba per nadal, ninoli, alberi finti ecc.
e parlando de alberi de nadal, me se vinu in amente i alberi che i comprava co iero mi picio. Naturalmente i iera naturali quela volta e sai alti. Tanto alti infati che una volta i ga dovu taiar un mezo metro per poderlo alzar e ancora el tocava el plafon. Una volta gavemo trova un nido fra i rami (ghe lo gavemo da a una vicina perche la canerina covava - ma xe un'altra storia).
Po, se atacava le candele sui rami, non ghe iera ancora i lumini, e co se le impizava de note iera de restar incantai, e credo non solo i fioi stava con la boca verta.
Po, se meteva anche tochi de ovata sui rami per far come la neve. Un ano mio zio, che viagiava, el ga porta dal'America un material tipo zuchero filato per far sta neve. Quel che non savevimo iera che iera fato con polvere de vetro (fiberglass???) e, dopo che gavemo coverto l'albero, ierimo tuti che se gratavimo. Sta polvere xe andada da pertuto.
E dopo, finalmente, xe riva i lumini. Che ogni ano non funzionava e un'altro mio zio, che iera eletricista, doveva venir da noi a giustarle ogni volta. Ma le candele iera sai meio.
Sto ano poso agiunger statuete al mio presepio perché, finalmente, uno dei empori piu grandi qua a Canberra ga importà scatolete de 3-4 figurine dal'Italia. Pero xe roba cara.
saluti
Dave
------------------------------
Da Desert RAT on Tue, 08 Oct 2002 17:47
Ciao Dave, anche mi me ricordo l'albero de Nadal quando iero picio, con le candele e ghe se meteva manderini, pomi e altre frutta, e se lo fazeva 2 o 3 giorni prima de Nadal, no un mese.
Dopo che me son sposà, mia moglie iera abituada al presepio, sicché gavemo sempre fato l'albero e de soto el presepio con laghetti, casette e cusì via. Alcune de quelle statue diventava vece, e qualche ano fa un grosso negozio american de sconto, per quei che vivi qua COSTCO, i gaveva questo bellissimo presepio per $30, no so come el podessi eser cusì bon prezzo, ma el xe fato... in Cina, quel che costa una statueta fatta in Italia.
Ciao Marcello
---------------------------
Da dcobau on Thu, 10 Oct 2002 02:26
Orpo, me iero dimenticà dei pomi e manderini. E anche el mandorlato e babbi natale fati de ciocolata.
Nei ultimi do ani anche mi stago fazendo el presepio. Go trova la roba basica un per de ani fa ma non podevo espander. Finalmente sto ano un grande emporio qua a Canberra ga incomincià a importar roba extra dal'Italia. I vendi scatole de pochi tochi, 4 pastori e do pecore, per 35 dolari australiani. Xe caro ma bon. Peca che non vivo là de ti, per 30 dolari (americani?) saria un'ocasion.
----------------------
Da sergio on Tue, 05 Nov 2002 08:59
Xe giusto che no ghe sia più alberi veri, perché iera proprio una strage de sti poveri alberi.
Ma te vol meter el profumo....
Anche se dopo per netar la casa dai aghi de pin....
---------------------
Da macondo on Tue, 05 Nov 2002 11:39
Qua de noi in Inghiltera i alberi veri de nadal xe bastanza facili de comprar. Anzi, se vendi più quei che i alberi de plastica. Credo che i vien de la Scandinavia, dove li cresi specialmente. Adeso i fa anche un sprai che cussí i aghi no casca più tanti...
--------------------
Da sergio on Wed, 15 Jan 2003 08:50
Ormai el Nadal xe pasado, anche l'ultimo, e resta solo ste influenze...
Ma, visto che son costreto proprio da sta stupida influenza a far ben poco (xe sai dura sto inverno), voio scriver un pensiero sui veci Nadai, che me par ormai perdudi per sempre, come quasi tute le tradizioni.
Da noi, come ga za dito qualchedun, qualche giorno prima se faseva l'albero che me par viniva poi disfado per l'ultimo (o per la Befana?). Xe za sta dito che se tratava de alberi veri, che se impicava anche fruti, ovata, candele vere, qualche bon bon de ciocolata.
Ala preparazion de l'albero dovevo sempre partecipar anche mi, prima con mio papà e poi, dopo i sei ani, con mio nono. Comunque iera sempre una meza tragedia, lori i se inervosiva sempre.
Iero ancora con mio papà quando xe rivade le prime candeline eletriche, una roba teribile. I fili se inverigolava sempre, e là iera le barufe più serie. Poi le lampadine iera mese in serie, e bastava una sola de lore che saltasi e no funzionava niente...
Bon, ala fine in un modo o ne l'altro l'albero iera finido, me par che noi no gavevimo presepe, o el iera ridoto ai minimi termini, e iera tuti contenti e pronti a festegiar.
La grande festa iera ala vigilia, no a Nadal. El pomerigio, con mio nono, se andava a visitar qualche parente, dove se se scambiava i regali, ma con gran cerimonia.
Tuti doveva spetar in un'altra stanza, mentre qualchedun meteva i regali soto l'albero, poi i sonava la campanela e tuti "coreva" a veder albero e regali.
Prima de vardar cosa se gaveva ricevudo (noi fioi ierimo i più impazienti
), bisognava star qualche istante in silenzio a meditar sula festività, tuti rivolti verso l'albero che concentrava l'atenzion. Poi me par se cantava tuti insieme "Stille Nacht" e forsi anche "O Tannenbau" e se se scambiava i auguri. Solo dopo iera i regali.Mio zio (el marì dela sorela de mio nono materno) gaveva sempre l'albero più bel, alto fin al sofito (forsi quatro metri), con un presepe immenso e molto ben fato. Le candele iera sempre "vere" e, se ricordo ben, el gaveva quel afar col manigo longo per impizarle e spegnerle.
La sera iera la stesa cerimonia, ma a casa nostra, più in picio, ma la campanela (de bronzo) la gavevimo anche noi (la se ga roto purtropo, ma forsi la go ancora de qualche parte). Poi iera la cena, dela quale però, come del pranzo de Nadal, go pochi ricordi, ma a mi no me piasi magnar.
Dopo cena speso se andava ala Messa de mezanote, in genere nela cieseta che sta in via Giustinelli. El giorno dopo, Nadal vero e proprio, credo restasi solo el pranzo, comunque no iera niente de significativo.
Ogi se pensa a magnar, magnar e ancora magnar. I regali la gente se li fa tuto l'ano, i alberi xe finti e anche i adobi xe tuti de supermercato, anzi, se la gente podesi comprar l'albero za pronto lo faria. Molti va in vacanza, el significato original nisun se lo ricorda più. Tuti varda la television e quel giorno no fa ecezion, forsi una breve interuzion per far in freta un brindisi durante la publicità.
Forsi esagero un poco, ma sento nostalgia de quei Nadai, anche se me considero laico. I te riempiva el cuor. Iera tuto ligado alo spirito, no ai soldi e al consumismo come ogi. I regali ghe iera, xe vero, ma gaveva el significato de "eco, ogi te pol concederte qualcosa". In 'sto giorno, dopo tuto l'ano che te se sacrifichi. Anzi, no xe che te se "concedi", ma te fa un regalo a chi te vol ben, e l'altro farà altretanto con ti.
A dir el vero lo scambio de regali iera meno poetico za a quei tempi, molti cercava de risparmiar e i faseva i conti del dare/avere. Ma non nell'ambito familiare. E comunque, ripeto, durante l'ano no esisteva quasi mai "regali" o "autoregali".
El mondo cambia, el progreso avanza, miga volerè restar a l'età dela piera?
Xe vero, ma de tante robe se podesi far a meno e se viveria mejo. E poi mi digo: xe mejo viver 100 ani "spiritualmente svodi" o 50 "spiritualmente ricchi"?
Mejo insoma un giorno da leoni o 100 da pecora?
Senza ofender le povere pecore, cosa me ne fazo de una vida longa pasada da solo in poltrona a vardar monade ala TV?
------------------------
Da HECHT GRAZIELLA on Wed, 15 Jan 2003 14:34
Te ga proprio ragionComunque de la campanela me ricordo anca mi, anzi pensavo (visto che mia nona e mio papà i vigniva del'Austria) che iera una usanza solo dela mia familia e anca per noi muleti, per poveri che iera i miei, ghe iera sempre qualche regalo.
Per quanto riguarda le candeline (quele che se impizava, no quele eletriche) mi, come al solito del resto, go rivà a combinar disastri; infati 'na volta zogando, visto che in camera iera poco spazio, go ribaltà l'albero e go ris'cià de darghe fogo a tuta la casa.
Noi no i ne portava a messa, ma prima e dopo del son dela campanela giogavimo a tombola, coverzendo i numeri ciamadi - come se usava in alora - coi fasioi: dopo però se li doprava isteso per far la pasta fasioi; come te saverà i diseva che iera la carne dei poveri, inveze ogi i costa più de la carne, forsi perché no i ga trovà 'ncora el modo de farli col petrolio o a rifarli con i scarti con vari e strani "procesi enzimatici".
'Naltra roba me sovien parlando de zoghi, le rare volte che mama e papà 'ndava fora de sera e noi ierimo sai pici (iera viva ancora la mama de mio papà che la xe morta co gavevo zinque ani) mia nona la ne tegniva boni con un cadin de acqua, do pirie, do caziui e qualche botilia e noi zogavimo a l'osteria impignindo e svodando botilie: meno mal che no semo diventai alcolizai ;D.
Quel che ne piaseva anca tanto far mi e mio fradel co no podevimo 'ndar fora perché iera bruto tempo, iera zogar sul leto disfà (dove con le coverte fazevimo monti e valade) coi soldatini de plastica, in particlar modo coi "cow boy", me ricordo 'ncora che gavevo anche la squaw che se podeva meterla sul caval: quante bataglie che gavemo fato e mi, logicamente, tegnivo sempre per i indiani, anca perché in alora no esisteva soldatini done de qualche altro genere.
Bon, come al solito te se rabierà perché son dada fora tema, ma confido che no te gabi la forza de rabiarte tanto, visto che te ga l'influenza! ::)
Ciao e guarisi presto! Lela.
--------------------------------------
)
oci, parchè dopo la lo cusiva col fil de imbastir e iera sempre barufa per chi che gaveva de magnar el toco più groso de sto ripien che el iera sai bon 
