Xe una storia interessante, volè che ve la conto? Va ben, va be... no ste insiter
Come che saverè, l'Austria iera in guera co' la Francia. I francesi che gà la grandeur, i voleva vinzer la guerra soli e in “tic e tac”. Visto che Cattaro iera “vizin” de Otranto, che la iera batùda de corazzate, incrociatori, silurenti, e sotomarini...
Ma spetè 1 attimo. Gò ditto sotomarini, ma i nostri no iera granchè a quei tempi... a Cattaro iera pretamente quei tedeschi, che i andava in giro pel mar a far disastri.
A proposito, savè vu che el record de affondamenti de un sotomarin, xe ancora della 1° guerra mondiale (no della seconda), che iera el U 35 tedesco e che anche lù el iera stado a Cattaro?
Insoma, per farvela curta, la base de Cattaro iera proprio una spina per 'sti francesi, che tra l'altro i le gaveva anche ciapàde perdendo un poche de navi, e i voleva a tuti i costi fracarghela alla KUK Kriegsmarine.
Pensa che te pensa, un uffiziàl più sveio dei altri ghe ga dito:
“Se noi in incognito portiamo tanti cannoni sul Monte Lovcen che sovrasta la baia di Cattaro ed apriamo il fuoco, distruggiamo tutto e poi i montenegrini si impadroniscono della base”.
“Orpo” ghe ga risposto i altri. “Ben pensada!” Iera el Capitano de Fregata Grellier.
Dito e fato, i gà carigà una nave e per le sconte, i ga sbarcà in Antivari. Coi mussi, muli e chissà che altre bestie, i ga fatto strassinar su i canoni fin a squasi 1700 metri, tanto ve xe alto el monte Lovcen e i gà fatto 4-5 postazioni de artiglieria intorno de lù. Subito sotto, iera i forti austriachi, che ve metto pulito un per de foto in modo che podè capir.
E un bel giorno, el 18 ottobre, i ga tacà a sbaràr su Cattaro.
El Capitano Klein, comandante della base de Castelnovo, i lo gà tirà zò del letto perchè no iera ancora ciaro e lù iera andà in leto tardi. Se sentiva 'sto remitur come in teatro co i fa el canòn co' la gran cassa; savè... xe tutto montagne intorno e el pel de l'acqua fa come de tamburo.
El mato, coi cavei impiradi e i oci de sonno, fora de lù, el ga domandà:
“Dov'è la flotta?”
“Al sicuro capitano, sono fuori tiro perchè i comandanti non sono mone. Piuttosto, ci sono problemi con i nostri forti, che stanno ricevendo molti colpi "über der kopf", i camerati di terra chiedono aiuto”.
E Klein, vardando su per el Lovcen, ga dito la storica frase:
“Se vualtri sbarè su nualtri, anche nualtri tireremo su vualtri”.
E i francesi, chissà coss' che i pensava, i gaveva portà su canoni de 120, qualchidun de 150 e un pèr de obici de 210 (de più no se podeva e no so gnanche se i li gaveva a portata de man), quando che le corazzate che iera a Cattaro gaveva canoni 'ssai più grandi che tirava più lontan.
Cussì, el Kaiser Carl VI se gà messo giusto al limite della portata dei francesi, e le gà comincià a tirar. Intanto, Klein ghe gaveva pasà un telegrama a Pola che i ghe mandi rinforzi. El telegrama diseva, testuali parole:
“Iniziato attacco di artiglieria dal Monte Lovcen, schierata la flotta per rispondere al fuoco, urge rinforzi dalle I.R. corazzate con calibri superiori a 240”.
E pulito, Haus ghe gà mandà zo la Monarch, la Budapest el Panther e la Wien, che la iera za vecia ma la gaveva i canonazi che serviva. Iera anche la Kaiser Franz 1°, dove che iera direttor de tiro un certo Cattarinich, un Lussignàn che tirava poco ma no sprecava un colpo.
I xe andai avanti a tirarse per squasi un mese, ma no sempre perchè de note i se riposava e de giorno iera spesso caligo. I francesi tacava de matina bonora, che i gaveva el sol in schena. I nostri cominciava verso le 11 perchè prima no i vedeva un boro.
Ma vu pensè che un artiglier de Marina xe abituà a tirar su pei monti?
Gnanche per sogno... in Marina i se tira de una nave all'altra, no dritto ma squasi. Però i artiglieri della KUK Kriegsmarine iera mati coli, massima parte cechi e austriachi. I gaveva mandà in giro i osservatori rampigadi più suso che i podeva, e lori ghe fazeva segnai co un sistema 'ssai pratico; i ghe trasmetteva le ore de l'orologio: 1 voleva dir longo, 3 a destra, 6 curto e cussì via.
No stè domandarme come che i trasmetteva, penso co' le bandierine perchè pensèvese se i ghe mandava el colombo... ora che te scrivi el biglieto, che la bestia se lassi ciapàr, che te ghe lo lighi sula zata, che te lo moli, che lù stremìdo se fazi un girèto... la guerra sarìa zà finida.
I 'taliani usava 'ssai i colombi, anche sui sotomarini, che spesso i finiva in tecia, povereti.
Inveze i nostri, anche se i gaveva delle carrobere al posto dei sotomarini, per certe robe i iera 'ssai avanti: i gaveva tuti la radio e anche la bussola giroscopica, che Barba Nane me diseva sempre:
“No stè fidarve de quella roba che gira come un zurlo, se ve manca l'eletrico andarè sui scoi, perderè la barca, la matricola e anca la vita!”
Eh... Barba Nane no gaveva tuti i torti, ma el iera all'antica. Per esempio, sui sotomarini la bùsola normale no funzionava ben, che intorno iera tuto fero e baterie... che anche per quel mi calcolo che Sauro xe andà su la Gagliola.
De cossa parlavimo? A si... dei truchi dei artiglieri per tiràr su pel monte.
Pensèvese che quando no i rivava a alzar i canoni più che tanto, i impigniva de acqua i scompartimenti per sbandàr la nave.. anche de 15%-20%. E i fazeva anche tiri alla cieca, che vol dir che i tirava come i obici o i mortai, senza vedèr dove che finiva el colpo perchè i bersagli iera sconti. Per questo serviva i osservatori.
Ma nò "alla ceca" della Cekia, quella xe un'altra roba... lassème finìr.
Per kibizàr meio, i mandava anche i oroplani, ma lori povereti no rivava a andàr su fin a 1700 metri, la guerra iera cominciada de poco e i motori no iera chissà cossa.
E no iera facile, perchè i francesi iera tremendi e i spostava i canoni de note per becàr le corazzate, una gaveva anche ciapà un colpo che no gaveva fatto danni. Tanto che Haus ghe ga mandà zo anche la Radezky, che gaveva canoni ancora più grandi, de 30,5 e la podeva tiràr de 11 km pacifica e tranquilla.
A proposito, la Radezky iera partida de Pola alle 6.40 de matina; alle 7.40 del giorno dopo la iera zà ormegiada drento le Bocche... altrochè l'Ungaro Croata e po' la Jadrolinia, che non se sa quando che se parti e quando che se riva, che per fàr la stessa strada, ghe metti dò giorni.
Quei de la Radezky iera l'orgolio della flotta, i gaveva anche tirà suso un balòn co l'omo e col fil del telefono che ghe correva zò fin in plancia.. pensèvese che trucchi!
Ma cossa volè che i se parlassi, l'omo sul balòn col comandante; “cicili ciocili, come va a casa,omaggi alla signora?”
Se i cucava col canociàl? Per forza che i cucava, i iera su per quel...
Ma no le putele al bagno, che quela volta le andava vestide come le munighe... i cucava i francesi!
Ma cossa gay... che quella volta gnanche no se saveva, i cucava i francesi per via della guerra!
Ben bon, lasseme finir sta storia che senò la diventa come siòr intento.
Insomma, giusto per finìrla, ve conto ancora che el remitùr ga continuà fin ai primi de novembre, quando che tutti i canoni francesi iera a tocchi e cominciava a nevigàr. El capitano Grelier duro de fredo, el ghe ga dito “ourevair” ai montenegrini e via lori co i bori de l'oio!
Tutti i artiglieri gà ciapà un mucio de medaie e xe cussì che se gà salvà la base de Cattaro e la defonta gà dura ancora un per de ani.
Una relazion inveze seria, ma ciaro eh"! a la tua no ghe manca niente! se nel libro sulla storia della marina au nella grande guera publicà un per de ani fa da la Goriziana, 3 volumi e soldi sai, sai ben spesi. Quella del Lovcen se sta la prima operazion combinada tra esercito e marina...
