I sotterranei dei Gesuiti

[sum culex]

Introduzion
(i comenti xè trati dal sito santamariamaggiore.191.it)
I soteranei dei Gesuiti xè i ambienti che se trova soto la cesa de Santa Maria Magior, costruida nel secolo XVII. La cesa de impianto baroco, che se eleva in pien centro vizin al celebre Collegio gesuitico(divegnù in seguito carcere criminal austriaco e carcere feminile italian) e i soteranei che a sti edifici xè colegai, i ga sempre atirà l'atenzion de studiosi de arte e apasionai del mistero. Autori del XIX e XX secolo come Pietro Kandler, Antonio Tribel, Giovanni Machorsich e no ultimo el grande colezionista Diego de Henriquez, i se ga ocupà de ripercorerli e descriverli, ma solo cole ricerche de speleologia urbana svolte dala Società Adriatica di Speleologia a partir dal 1983 se ga podù aver un quadro più ciaro dela situazion.
Ogi per la prima volta, sti afascinantio ambienti xè visitabili in tuta sicureza grazie al'interessamento dela Parochia de Santa Maria Magior che, insieme ai volontari dela sezion urbana dela SAS, i li ga verti al publico.

Entremo nei soteranei de una portisina in Piazeta San Silvestro.
El primo ambiente che incontremo, tuto restaurà, xè la sala dele mape.
Ecoghene alcune

Pianta dei Soteranei che porta la data 1885

[sum culex]

L'acesso

[sum culex]

Sul più bel che stavo postando le foto Imagestime se ga dà latitante; sperando che el torni proseguirò con sto lavor più tardi o domani.
ciao
sum culex

[sum culex]

Il cunicolo del gatto e i depositori (punto 1)
Nel primo ambiente dei soteranei dei gesuiti trovemo una galeria che se svilupa soto le fondamenta dela cesa. Sul ingresso se nota la carcassa de un gato mumificado. Vizin se nota due nichie dotade de un sistema de canai de scarigo, che poderia esse stai dei 'depositori' e loculi de decomposizion, dove che saria stade sistemade le spoglie dei frati spetando de poder trasferir i resti nei ossari.



I primi esploratori ga trovà in sto cunicolo un gato che no ga volù in nissuna maniera andar fora e dopo diverso tempo el ga volù morir là.

[sum culex]

La nicchia con arpione (punto 2)
In alcune descrizioni che risali al secolo scorso e anche nela ilustrazion a stampa del 1884, publicada dal Tribel, nel interno dei soteranei se nota alcune nichie proviste de un arpion metalico fissà nela perede. Sempre secondo la tradizion locale ste nichie saria servide a tratignir in cadene i malcapitai che spetava el processo inquisitorio. Sule parede se nota dei grossi cardini de metal che gavessi dovù soreger i pesanti batenti de chiusura.



La cripta dei Petazzi (punto 3)
Se trata de una cripta sepolcral, l'unica presente a Santa Maria Magior. La xè stada costruida insieme al altar che se trova de sora dedicado a San Francesco Saverio, per conto dela contessa Beatrice Dornberg ala morte del marì Niccolò Petazzi che xè avignuda nel 1664. Secondo Pietro Kandler (1853) là dentro xè stai sepelidi tuti due i nobili coniugi. Secondo Antonio Tribel (1884) 'nella cripta solevano vedersi gli avanzi di un sarcofago' che iera apartegnù ai Petazzi. Durante le esplorazioni fate dala SAS nel 1984 el sarcofago no iera più presente.



Una 'chiave di volta': una soluzion aveniristca per quel periodo fata per scarigar le tensioni del'architetura dele volte. Notè in particolare i matoni, fati a man un per un per darghe la forma necessaria ala costruzion.

[1382-1918]

Interessante!
Ma nela foto che te ga fato dove se vedi el gato, vardando meio, davanti al gato, me par come de veder una sariandola o simili, no?

[sum culex]

La camera rossa (puno 4)
La local tradizion (che però elementi storici sicuri no la conferma) indica in sta sala dei soteranei el posto scielto dal Inquisitor per i sui interogatori: nela nicchia più grande stava quel che iera interogà, fermà con dele cadene, nela nicchia col sedil stava el giudice nel suo abito scarlatto. Sta carateristica ghe ga dà el nome a questo particolare ambiente: la Camera Rossa.



La camera Rossa e la bocca del 'Pozzo delle anime'



Il pozzo delle anime (punto 5)
El xè profondo circa 6 metri e el presenta sezioni de forma diversa a seconda dei livei. Ala base el xè de forma circolare e el xè scavado nela riccia, dopo el diventa quadrato con perede de piere squadrade, poi se ripeti,un a parte cilindrica per finir verso la superficie con una sezion otagonal. El ghe devi el nome ala legenda secondo la qual i inquisidi vigniva immersi a testa in zo nel'acqua. El 'Pozzo delle Anime' iera sconta da una oclusion e el xè sta scoperto nel 1984 dai speleologhi dela SAS. Dentro xè stai trovai materiai seicenteschi che ogi xè conservai nel 'Speleovivarium'

[sum culex]

L'ingresso ala 'Torre del Silenzio'

[sum culex]

La Torre del Silenzio - la feritoia (punto 6)
La strutura con scala a spirale costruida in piera arenaria, che se inalza per 25 metri sora la Camera Rossa, xè ciamada 'La Torre del Silenzio'. Ala base de sta tore, che presenta carateristiche de tipo militar, se verzi una feritoia che se inoltra per 2 metri nele fondamenta dela cesa. Sta feritoia no porta al'esterno perchè la se trova soto el livel del teren esterno, ma ala base trovemo un pozzeto circolare che se svilupa in alteza per circa 4 metri proprio dentro i muri dela trorre.






Torre del Silenzio - la sala con trabocchetto (punto 7)
Questo vano interno ga sule paredi carateristiche feritoie strombade poviste de tacche de mira. Sul pavimento se verzi un pozeto che scendi de 4 metri. No se sa de preciso che funzion che el gavessi avudo; qualchedun lo indica come 'trabocheto' perchè el termina al'alteza dela feritoia. In alto se nota una carucola che serviva per calr una corda. Qua dentro i ga trovà alcuni manoscriti in latin de alievi dela scola gesuitica presumibilmente scriti nei ani '70 del XVIII secolo.

[sum culex]

[sum culex]

Torre del silenzio - il coro e il vano con feritoie
A metà altezza dela torre se incontra uno dei "cori", e cioè i vani laterai che in origine i se afaciava diretamente sula navata central dela cesa. Sul pavimento se nota ancora due busi incornisai de legno che i origine serviva per calar el candelabro che ilumnava l'altar che iera de soto. Sul lato interno de sta sala se verzi un altro vano inglobà nela strutura dela torre e anche questo ga feritoie de tipo militar murade verso l'esterno.



Torre del silenzio - la soffitta con le iscrizioni
L'ampia sofita che se ragiungi salindo per la scala a chiocciola dela Torre del Silenzio xè disposta soto el teto a 17 metri e mezzo de altezza. Un ampio finestron a lunetta se affaccia verso l'esterno dal lato dela piazzeta San Silvestro, mentre sui muri se pol trovar graffiti (che no go fotografà) de antichi visitatori dela fin otocento e firme de ospiti rifugiai qua dentro durante la seconda guera mondial.



Sto local servi anche de deposito de quadri dismessi, decori, ecc.

[sum culex]

Torre del silenzio - passaggio ai tetti (punto 10)
La torre del silenzio termina a 25 metri de altezza, con un passagio che porta ale sofite. Subito prima del'ultima girada de scalini atraverso una portisina se pol aceder ai teti. Da sto punto panoramico se godi de una vista non comune sora i teti de citavecia e sora una vasta parte del golfo.

[sum culex]

Altri particolari dela scala a spiral prima del passagio ai teti. I scalini in piera arenaria massicia xè autoportanti in quanto i xè stai impirai durante la costruzion dela torre per 30 centimetri nel spessor dei muri. I xè tuti fati a man e per questo un poco irregolari, la parte inferior dandoghe una forma triangolar al scalin xè obliqua per evitar che nel vano tra un scalin e l'altro se acumulassi del gas.














Una bona parte dele foto me ga tocà farle col lampo data la scarsa iluminazion anche se mi zerco apena possibile de evitar sto sistema. Alcune de quele che go rivà a far senza lampo le xè purtropo un poco mosse, perchè anche pozandome dove che iera possibile le pose lostesso iera tropo longhe e me ga tocà contentarme.
Spero che sto servizio ve gabi piasso e sodisfà; in efeti xè un sogeto poco visto e conossù.
ciao
sum culex

[babatriestina]

Grazie per l'ampio servizio, che mi, intimidida dei divieti de fotografar e che in quella visita nissun tirava fora la macchina fotografica, no gavevo osado, però qualcossa la gavevo messa, soprattutto de spiegazion, ala fin del mio post sula cesa dei gesuiti

[AM]

veramente interessante non ne ero a conoscenza di questo posto

[1382-1918]

I primi esploratori ga trovà in sto cunicolo un gato che no ga volù in nissuna maniera andar fora e dopo diverso tempo el ga volù morir là.

Davanti al gato, me par come de veder una sariandola o simili, no?

No go capido quando e come se pol visitar sto posto. Bisogna cior apuntamento o ghe xe dei giorni prestabilidi?

[sum culex]

Xè vero; mi no me iero gnanche acorto.
Se no me sbaglio me par che bisogna cior apuntamento.

[babatriestina]

o se ciol appuntamento, o se approfitta de visite guidade organizzade de varie associazioni triestine, mi ero cola Panta Rhei l'anno scorso. A volte inveze iera la parochia stessa che organizzava visite.

[babatriestina]

rimesse tute le foto