Zercavo una foto - che se rivo a trovar ve la meto - e cusì go dovudo sfoiar quele vecie (che le dovesi sempre ordinar, perché co se zerca qualcosa no se la trova mai). Me ze vignude in man vecie foto de famiglia, dove apari le varie stanze.
A parte la tristeza de veder persone care ormai scomparse da tempo, me ga colpido la diferenza tra la casa de alora e quela de ogi. Quela de ogi al confronto la fa schifo, pur gavendo in parte i stesi mobili. Ma no xe question de gusto, come in un primo momento go pensado. El numero dei mobili ogi xe un multiplo de quei de quel tempo, i xe tuti pieni e xe anche roba per tuti i cantoni. Ma no podesi dir che la qualità dela vita sia migliore. La magior parte de questa roba la xe inutilizada da anni.
Forsi xe qualcosa che no va nel nostro modo de viver. Sto benedeto consumismo no porta benessere, anzi...
Go un mucio de libri, e quei va ben, tra legerli e consultarli dificilmente i resta inoperosi
, aparte qualchedun de cui parlo dopo. Poi go un tre armadi de CD (quasi tuti originali) che se dovesi ascoltarli uno al giorno ghe materia no so quanti anni. Certo, li go scoltadi tuti almeno una volta, ma poi la scelta va sempre su un cerchio ristreto. E i altri? Cosa far? Venderli? E chi li compra? Ogi tuti vol roba nova e poi i apasionadi ga el steso problema mio. Butarli? Con quel che ga costado! Regalarli? Per no sentirse dir nianche grazie (quasi che i te fazesi un favor a portarteli via) o magari vederli rivendudi (me xe za suceso). Stesa roba per i film su DVD. Visti una volta, quanti vignirà visti una seconda? Gavevo provado a vender per poche lire le cassette VHS (film o documentari), certe molto valide e introvabili. Nisun ghe interesava. Ala fine, dopo averle registrade su DVD, le go regalade. I veci LP ormai li buto via, dopo el riversamento su CD. Gran parte li go vendudi, ma li vendevo tipo per 1000 lire e chi li ricomprava li rivendeva 10 o 20 volte tanto (se no de più). Ma ghe vol gaver giro.Coi libri veci xe la stesa storia. Libri che no me interesa ma de valor, go provado anche da antiquari. Un libro raro del '700 che val almeno 7-800 euro. Ghe go scrito a un antiquario in svizera. "Sì, el me dixi, ghe ne go un anche mi, el val, ma nisun lo compra."
I veci servizi de piati e biceri no se li usa certo ogni giorno, perché i se pol romper e saria un pecà. Una volta iera speso pranzi o cene, ogi ognidun cena a casa sua davanti ala TV o se se trova a magnar fora. Chi ga più voia e tempo de bazilar per pranzi a casa?
No parlemo dela roba tecnologica, che dopo un poco la se rompi o la xe obsoleta. Se ciol el toco novo che costa meno e funziona meio (ma semo sicuri?). E el vecio? E cosa, buterò via una roba che ancora funziona? Cusì resta là, inutilizado, a ocupar spazio inutilmente. Persino i veci sci - almeno quei sta in cantina - che probabilmente no userò più (per via de l'incidente), se però dovesi andar con lori in montagna tuti me rideria drio, perché ogi ghe xe i sci pici e tuto curve. Xe come se una volta se fosi andadi con i sci de legno e atachi fisi e magari le rachete de bambù
(ma finché no i se gaveva roto la gavevo anche fato)Go quatro pc de cui un portatile. Oviamente de anni diversi. In teoria ognidun ga una sua funzion, ma in pratica ormai ghe ne uso solo uno. Ma i altri fuzniona ancora, perché dovesi butarli via? (un dei miei veci pc - saria el quinto - xe quel che Franco usa per el server de questo forum
, quindi el xe ancora utile)Ogni tanto me riva a casa la publicità de sti supermarket, con un mucio de roba bela e invitante e a prezi nianche cari.
Ah, che bel, me digo, questo quasi quasi me lo ciogo!
Poi conto fino a diese, me sento al computer e penso
"Xe meio star a casa a lavorar, te son proprio sicuro che spender quei soldi xe realmente necesario?"
Da quando me se ga roto la stampante a colori diversi anni fa no ghe ne go più ciolto una, quando me servi stampo ancora in B&W con la mia vecia HP LaserJet 4P. La go ciolta 14 anni fa e la funziona ancora egregiamente. Quele ciolte dopo le se ga tute roto. E poi go veramente sentido la mancanza de una stampante a colori? Diria de no. Sì, forsi gavesi stampado qualche foto e qualche copertina, ma quante? Se divido el costo per l'uso che ne gavesi fato (più carta toner, ecc.), ogni foto me gavesi costado un capital. E per farghene poi cosa? Per meterle in casetin a ocupar altro spazio? Ala fine son contento de no gaverla comprada.
E cusì el discorso podesi continuar a l'infinito per vestiti, eletrodomestici, ecc. Posibile che no ghe sia una via d'uscita?
Qualche volta volesi azerar tuto e andar a viver in una casa svoda, magari portandome drio solo el streto necesario. Ma poi ricascheria de novo in sto zogo perverso?
Che poi una parte xe roba che no se usa più, o se la usa sai poco. Ma come i fazeva a viver una volta senza i armadi a quetro stagioni? E pur i viveva ben....
