Nisun ga più replicado
, epur ghe saria tanto da scriver (ghe xe una infinità de libri, dibatiti e conferenze a proposito).
Mi no son economista, ma el mio lavoro iera principalmente quel de analizar i problemi per trovar dele soluzioni, roba che in genere me riusciva bastanza ben (ma no xe dito che lo sia su tuti i argomenti
).
Comunque l'economia, se a l'economia volemo limitarse, xe una roba piutosto complicada, sopratuto ogi. Pasadi i tempi dei barati, dove "mi te dago una roba e ti te me dà un'altra de presunto pari valor", iera rivadi quei dela moneta di stato, prima garante de se stesa (metallo prezioso), poi garantida da un ente che godeva de una certa fiducia e de fondi corispondenti al valor virtuale emesso (moneta cartacea o de valor inferiore e poi i assegni o simili).
Ogi questa virtualità xe la regola, e non sempre la xe garantida. Esisti anche le operazioni economiche "allo scoperto", come quele del acquisto de azioni che vien pagade in seguito (se se vendi le stesse) e che ga provocado grandi crisi quando el valor dele azioni diminuiva e l'acquirente no gaveva i soldi per pagarle ala scadenza (e me par che ala fine i mutui sule case che ga provocado la crisi atuale sia una roba simile).
La tecnologia poi permeti passaggi virtuali de grosi capitali da una parte a l'altra del mondo, per cui diria che asumi meno importanza el dove questi capitali virtuali vien conservadi, riapeto al dove i vien spesi.
E arivemo quindi al problema dela circolazion del denaro (virtuale o meno) in cambio de beni materiali. Ghe entra i grosi spostamenti de popolazioni che guadagna in un logo ma spendi in un altro (le rimese dei imigrati), i investimenti esteri, la produzion estera (col pagamento de tasse, machinari e mano d'opera in altro paese), oviamente le esportazioni e le importazioni, sempreché i capitali acquisidi veni poi spesi nel paese interesado.
Insoma, xe una roba molto complesa e dificile da controlar.
L'obietivo dei politici, cioè de chi cerca de gestir el sistema economico de un paese, xe de far che entri capitali e che i vadi mesi in circolazion, per favorir la produzion de beni materiali o de servizi e quindi la crescita de posti de lavoro o la difesa dei quei esistenti.
A parte el fato che se sti posti de lavoro vien asunti da persone che no spendi sul logo ma invia el denaro altrove el mecanismo no sembra funzionar, ghe xe qualcosa che no quadra.
Intanto grosa parte del capitale va a l'estero, oltre che per investimenti, anche per l'acquisto de materie prime e più se produci e se consuma più aumenta questo acquisto. Per l'Italia scordemose de eser autosuficienti soto questo aspeto, visto che de materie prime (petrolio, minerali, uranio, ma anche generi alimentari) ghe ne gavemo pochissime. Quindi più aumenta la produzion o el consumo de beni più aumenta l'importazion de materie prime. Solo con l'esportazion se pol andar in ativo, ma qua entra in zogo la concorenza con paesi che no solo ga ste benedete materie prime, ma ga anche un costo lavoro molto ma molto più basso.
Quindi far circolar el denaro disponibile pol non eser una soluzion, se questo xe in continua diminuzion. Podesi eser quel de spostar l'obietivo dala produzion de beni a quela de servizi sociali, ecologici, ecc? Forsi, ma ghe vol veder se la gente xe disposta e rinunciar al celulare o ala nova auto per gaver in cambio un ambiente più pulito, nove scole, novi boschi, ecc.
Me domando infine perché lo stato invece de spender cifre enormi per stipendiar chi sta a casa senza far niente (magari senza colpa, per perdita de lavoro) no i spendi le stese cifre per far lavorar le stese persone in robe socialmente utili. Sicuramente xe anche un problema sindacale, perché un pol ricever tot euro al mese senza far niente, ma se lavora ga dirito a molti de più, quindi la spesa xe de molto superiore. Sarà giusto, ma cusì la società affonda e ala fine ghe rimeti tuti, compresi quei che ogi ciapa l'indennità de disoccupazion o la cassa integrazione, ma domani, quando lo stato no gaverà più soldi (se lavora sempre meno persone e la popolazion aumenta) no poderà pagar né l'uno né l'altro e forsi nianche le pensioni.
No son in grado de pensar a soluzioni, xe una materia tropo dificile e vedo che anche i esperti no ghe ne ga una pronta, ma sicuramente andando avanti cusì no se riva de nisuna parte, se non proprio da quele dove no volesimo andar...
un poco mejo de quel che i ga fato qua:
