Verso l'uscita

[Zigolo]

Giusto un ano fa, torziolando un poco in giro, son passà davanti a una casa che ga subito atirado la mia atenzion, tanto che, per vardarla, squasi no me inacorzevo che in giardin, posà su un albereto, ghe iera un bel zigolo nero che cantava: zii..zii..zii..zii..zii..zii.. El bel xe che in giardin iera anche un do o tre de lori che discuteva se iera zigolo nero o gialo, e mi, che per ste robe vado a noze, son subito intervignù, anche se i gaveva zà capido senza il mio aiuto che iera un zigolo nero e no gialo.

A sto punto me son anche vardà intorno in sto giardin, e go trovà un fraco de usei, altre bestie, fiori, piante, tanto che de quela volta lo go frequentà quasi ogni giorno, e man man che passava el tempo e cambiava le stagioni, el se popolava sempre de più de fiori e de bestiuze.

Ma visto che iero stado cussì ben acolto in giardin, son stà curioso de cucar anche drento, e anche qua go trovado una bela acolienza. Iera una bela casa, piena de stanze, qualcheduna pareva una biblioteca, qualche altra una galeria d'arte, in certe iera vetrine piene de bele robete dei tempi andai, in altre bacheche con cartoline e francoboli, de una finestra se vedeva come che scori el trafico zò in cità, de un altra se gaveva una magnifica vista sul porto, e cussì via. Su una porta, po', ghe iera un'aquila a do teste e dentro la stanza un'altra aquila a curar che tuto sia ordinato. Anche in cantina iera qualcossa, una palestra o forsi i fazeva altre atività sportive, ma visto che mi e el sport no 'ndemo per gnente d'acordo, no go mai messo el naso drento, e devo dir che de fora no se sentiva propio gnente de quel che sucedeva drento. Ma gran parte dei altri locai li go visitài, anche se i iera dedicadi a argomenti che no me xe tanto familiari. Anzi, ghe xe stade otime ocasioni de imparar qualcossa. E nela stanza del’aquila, anche se no son assolutamente nostalgico de certe robe, me son trovado ben diverse volte.

A un certo punto go comincià a notar che in ogni stanza, o quasi, ghe iera un crocifisso, come se usa ancora nele scole, ma no ghe go fato tanto bado, fin la scorsa setimana quando, entrando in una de ste stanze, ghe ne go visto un che el pareva sai più grande e vizin el gaveva no la foto del presidente, come se usa ancora nele scole, ma quela del papa. E proprio del papa i stava discutendo animatamente, con un che criticava le sue parole e altri che inveze le giustificava. A meno che no me sia perso qualcossa, la discussion rientrava in termini civili e de normale dibatito.

Stavo quasi per partecipar ala discussion quando, tut'intun, se spalanca una porta e vien drento un, coi oci fora dela testa, che taca a zigar come un mato minaciando de sbater fora chi che gaveva iniziado sta discussion. Devo dir che son restà sai mal co go scoperto che sto qua, che in un ano gavarò visto in sta casa tre o quatro volte, xe el paron de casa, de una casa che no pareva gnanche che podessi gaver un paron.

Mi alora pian pianin, prima che me rivi in testa qualche cristalo de Boemia, go girà i tachi e son andà verso l'uscita, ghe go dà un'ociada al giardin, dove un ciapeto de codibugnoli se stava ciamando, e son tornà sula strada. Publica, pel momento.

[macondo]

Caro Zigolo, ma dispiasi assai che te ga deciso de lassarne. Te son stado in questi mesi l'esperto residente de la fauna ornitologica e piú de un sentirá la tua mancanza. Mi son uno dela 'banda' e te dago ragion quando te disi che in molte stanze ghe xe un crocifisso. Se te vegnivi nela mia, te gaveria trovado inveze un gigantesco poster de Che Guevara e una bandiera rossa
Ben bon, el fatto che ghe xe tra i aministradori del forum qualche catolico praticante no implica necesariamente che esisti censure o ostilitá nei confronti de chi che la pensa differente, ateo o agnostico o pagan. Se fussi stado cussi, saria andado via anca mi assai tempo fá.
Te posso garantir che in sto forum se pol discuter de qualsiasi argomento con tuta la forza e la energia che te vol.
Le due sole robe che no toleremo xe:
1) Che se personalizi le discussioni. Se uno no xe d'acordo con l'altro, no per questo el xe un namo. Semplicemente la pensa diversamente e se pol (o se devi) atacar le sue idee, no la sua persona.
2) Che se ofendi le persone (o grupi de persone) per raforzar i argomenti. Dir che el papa ga sbagliado no solo xe acetabile ma anca benvenudo. Dir ghe el xe un segaiolo no solo xe de mal gusto ma anca no raforza necesariamente el argomento.

El fato che semo co la pele sotil su sti due punti vien de l'esperienza che gavemo avudo in un vecio forum che no esisti piú. Per dirla con un proverbio: "La gata che se scota co l'acqua bolente, dopo la ga paura anca de l'acqua freda". Infati, tra altre robe, queste xe stade in parte la ragion perché se ga cominciado le barufe che se ga concluso con la sparizion del forum e de un enorme patrimonio cultural che se gaveva acumulado in tanti anni.
No voio convincerte che te resti. Mi saria za contento che ogni tanto te ne cucasi.
Ciao.

[babatriestina]

Mi son cattolica praticante, no lo go mai sconto, e ritegno che sia un fatto mio personal e no credo che sia proibido. No credo de averlo mai fatto pesar sui mii post nel forum, se no a volte per precisar fatti che me pareva riferidi in maniera imprecisa. Se questo vol dir che go un crocefisso impicado drio de mi, no so, ma no savevo che gaver un crocefisso vol dir esser considerada un'appestada. No gavessi mai pensado che qualchedun decidi de no voler partecipar a un forum perchè no ghe piasi la confession religiosa dei forumisti.
Quel che xe nato e la reazion del Capo gaveva altri motivi che una semplice critica e la discussion se stava avviando non proprio nei termini civili che dizi Zigolo.
Ognidun ga le proprie idee, mi go assai apprezzado i tui interventi e la tua esperienza e trovo che te ghe ga dado un ottimo apporto al forum. Però son semplicemente allibida che qualchedun pensi de uscir de un forum per incompatibilità con le opinioni religiose de altri forumisti.
E sia ben ciaro, e qua parlo de moderator, in sto forum no se censura le idee, ma solo la volgarità e le offese ai altri, forumisti o meno.

[Zigolo]

No gavessi mai pensado che qualchedun decidi de no voler partecipar a un forum perchè no ghe piasi la confession religiosa dei forumisti.
...son semplicemente allibida che qualchedun pensi de uscir de un forum per incompatibilità con le opinioni religiose de altri forumisti.

E infati no xe cussì, ghe mancassi altro!

Forsi no son rivà a far capir ben le robe. Oltre al crocifisso, go cità anche l'aquila a do teste, dichiarando esplicitamente che non son nostalgico de quela parte. Anzi, se volemo, la mia aversità nei confronti dela defonta la xe superiore a quela nei confronti del catolicesimo perché al'origine del catolicesimo ghe xe anche la parola de Cristo, che xe comunque una parola de amore, mentre drio l'impero ghe xe un'idea de dominio. E comunque no me par de averghe dà contro, né a una né a l'altra idea, go scoltà, go imparà tante robe e qualche volta go comentà, ma anche se no iero d'acordo, no me xe mai vignude idee de taiar raporti a priori.

Al contrario, son restà veramente mal a la reazion del capo, sopratuto perché non suponevo gnanche l'esistenza de un'entità cussì suprema e, sopratuto, autoritaria. Che questo sia successo in una disputa riguardante le parole del'autorità suprema dela cesa catolica xe solamente un caso.

No go vissudo le risse che me contè e posso veramente capir la ferma volontà de impedir che le sucedi de novo, però la vera violenza che mi go visto xe stada quela de voler reprimer un discorso che, per quanto aceso, iera sai meno violento.

[Zigolo]

Se te vegnivi nela mia, te gaveria trovado inveze un gigantesco poster de Che Guevara e una bandiera rossa

Mmm... no xe mal, anche se preferiso Bakunin o, ancora mejo, Kropotkin

Per quanto riguarda el catolicesimo, con la risposta a baba penso de aver chiarido anche con ti.

[Elisa]

a continuaziòn de tante parole sincere de stimolo, me azardo anca mi a postar ste righe, poche, che però le vol aver el merito de esser stade scrite subito dopo el to ultimo post de l`altro dì en 'salotin'.......ma no date a conoser per esitazion, per colpa de la me timideza!

Dai Zigolo, no stà a minaciar de lasarne!!! Meti tut sula balanza e te vedrai che la ghe riuscirà a pender da la banda a favor de la to decisiòn de continuar qua e ben con tut el to bagaglio cultural!

[babatriestina]

No gavessi mai pensado che qualchedun decidi de no voler partecipar a un forum perchè no ghe piasi la confession religiosa dei forumisti. ..

E infati no xe cussì, ghe mancassi altro!

Grazie!

[AdlerTS]

Sicome semo adulti e liberi, fa come te se senti. Le ns. ragioni non tornerò a ripeterle. Tien conto che la stessa porta che te usi per andar fora, te pol usarla per tornar dentro. Vedi ti.

[serlilian]

Me dispiasi Zigolo. Aprezzavo assai i tui interventi equilibrati, sereni, spesso con una vena de umorismo, e propio per questo no rivo a capir come che te possi difender un modo de esprimer le proprie idee violento e maleducato, tanto diverso del tuo.
Spero che te ghe ripensi e che tra un poco te torni tra noi.
Te speto.

[macondo]

Mmm... no xe mal, anche se preferiso Bakunin o, ancora mejo, Kropotkin

Se ghe penso ben, la mia la xe piu rossa e nera che solo rossa...

[Zigolo]

Ringrazio tuti quei che me ga calorosamente invitado a restar e, visto che penso de gaver ancora diverse robe de dir, anche per spiegar mejo quel che forsi no xe stà capì, l'unica xe de continuar a discuter e quindi restar qua con voi.

In fin dei conti, in questa diatriba sula forma dele discussioni, no me par de esser stà mi a eceder, mi go semplicemente trovà spropositada la reazion del'aministrator, che ga zercà de far taser con spiacevole violenza un utente del forum col quale, ghe tegno a precisar, non go mai gavù nisun contato fora quei presenti in sto forum (in ciaro, gnanche mp).

E el piazer de trovarse ad afrontar interessanti argomenti con persone valide copa un fià l'amaro de no sentirse proprio tanto liberi.

Ma adesso ve lasso perché fra la fauna del giardin xe ancora un ciapeto de codibugnoli che me speta.

[serlilian]

[sum culex]

Basta che te resti. Va benissimo: no volemo che te vadi via, te ne servi ancora per tante robe e per tanto tempo
Te xè tropo bravo per lassarne!
ciao
sum culex

[Nona Picia]

Secondo mi, l'unico tuo eccesso xe sta co te ga dito de voler scampar! No sarìa sta pecà? Con tuto quel che te ga ancora de contarne?

[sono piccolo ma crescero]

Mi no ocori che digo che son contento!

[nanaia]

Ottima decisiòn Zigolo: perder boni intelletti xe sempre un pecà. El confronto de opinioni anche se diverse (forsi proprio perchè diverse, in realtà) se fatto in maniera pacata no pol far altro che favorir la nostra crescita intelletuàl.