Nele nostre due escursioni, una qua localmente, nela Nicola valley e una a nord nela provincia de Alberta, son rivà scatar un per de bele foto de animali e interesanti foto dela formazion geologica dela vale del'Okanagan e del Nicola.
Per cominciar, un per de foto de un "osprey" (in Inglese), el cui nome scientifico xe "Pandion haliaetus" . Qua lo ciamemo anche falco marin o aquila marina. Xe un maestoso usel, grande e bel che se nutrisi esclusivamente de pesi. El fa i nidi sui tronchi dei alberi veci e tante volte sui pai de eletricita de alta tension. Per quel la BC Hydro, l'azienda idroeletrica dela British Columbia, co i instala pai vizini ala costa de un lago o de un fiume, sora i pai de alta tension i ghe meti dele piataforme, cusì che el falco el se fa el nido senza ris'cio de farse mal.
Eco le foto, un in volo, mentre che el se prepara a sorvolar la superficie del lago per becar un pese e una nel nido, pronto a atacar corvi, in caso che i zerchi de rubarghe i ovi.
(Sto ultimo corvo, quel col caperl son mi).
La formazion geologica de squasi tuto el sud centrale dela Colombia Britanica xe tipicamente un strato relativamente sotile (relativamente parlando) strato de rocia, tipicamente quarzite o granite oput quel che noi ciamemo "intrusive rock" che xe una rocia giovine, altamente riascaldada e rota o in strati o se no in cubi. Soto quel strato superficiale, se trova el leto de lava che se ga alzado soto tera e ga formado la natura del nostro logo. Praticamente ogni monte più o meno conico che se vedi qua de ste parti xe un vulcan spento dove che se pol renderse conto dei cataclismi pre-glaciali che gavevemo gavudo qua. Ma in nisun post no go mai visto cusì ben la formazion come sula montagna del est del Nicola lake, dove che jerimo a far del camping. Se vedi propio distintamente la rocia superficiale e soto la lava che la ga forzada in alto.
Tornadi a casa dal camping me son roto la schena per far un recinto de legno, che cusì no go de preocuparme de Roxie, che ghe piasi visitar i cani che pasa per la strada, dopodechè semo andadi fin a Falher, un picio vilagio de meno de 1000 abitanti, al nord del'Alberta.
Per strada semo pasadi per i grandi parchi nazionali e privinciali che, abitualmente i xe popoladi de selvagina che gironzola pertuto, coscienti che i ospiti nela foresta del parco semo noi e no lori. Ma sto ano gavemo visto poche bestie perchè con tute le piove che gavemo gavudo, lore le resta in montagna dove che cresi l'erba fresca e nesun ghe rompi le scatole.
Comunque gavemo scatà un per de bele. Pecà che gavvimo visto un lupo giovine, forsi meno de un ano, e un baby grizzly che no no semo rivadi a fotografarli. La prosima volta!
Nele foto, due wappiti e un branco de cavre selvadighe.
Arnie
