La setimana scorsa qua ga veramente nevigado come che se devi per una note. Pensavimo che finalmente gavesimo gavudo un poca de neve anche in vale e no solo sule montagne. Go fato un poche de foto dala teraza de casa mia e de drio dela casa, tanto per farve veder che bela nevigada. Gnanche una setimana dopo e la xe tuta squasi sparida, con temperature che se agira sui 3º fin a 6º sora zero. Adeso noi dovesimo eser int'un pie de neve (31 cm), ma propio come minimo e le temperature dovesi eser dai -10º ala masima de -3 o -4º; queste qua de noi. Più a nord che se procedi e più le dovesi cascar. Prince George, che xe el centro geografico dela Colombia Britanica, dovesi marcar i -20 -30 de note e al masimo i -10C de giorno. Go guardà adeso, le 9.30 de matina e la temperatura xe -2.
Eco la diferenza de solo qualche giorno dopo la nevigada.
Orso
