Salute

[Ursus Canadiensis]

Volevo scriver sta nota forsi più tardi, ma dopo gaver constatado la serietà dela situazion medica dove che me trovo, la scrivo ogi.

Venerdì scorso son stado ricoverado al'ospedal de emergenza pervia de dolori al stomigo a el baso torace e, dopo un per de TAC i me ga dado la "bona" notizia che go un cancro al lobo inferiore destro del polmon, metastizado ale ghiandole adrenali.

I ga meso in marcia imediatamente tuto el proceso e, conseguentemente, omincio la terapia la setimana prosima. Saria stado probabilmente sai dificile comunicarve sta roba una volta stabilido nel ciclo de chemio e radiazioni, per quel che ve lo comunico ogi.

Ve vojo sai ben a tuti e, se el mio caratere spinoso ga urtado qualchedun... se ghe la fazo a vinzer sta batalia, cambierò. PROMESSA!


Arnie (Orso)

[nonna ivana]

La salute, è un bene prezioso!
Un abbraccio Arnie (Orso) e via con coraggio ad affrontare questo percorso duro!
E noi inviamo pensieri positivi, una preghiera se può andare, ma soprattutto amicizia!

[sono piccolo ma crescero]

Caro Arnie, guanta duro.

Me associo in tutto e per tutto a quel che ga scritto nonna Ivana. La lo ga scritto meio de come che gaveria podù scriverlo mi.

Anche se lontani, anche se no te conoso de persona, te assicuro che te penso e penserò. No rabiarte se proverò anche mi a dirghe a Signoridio de darte un'ociada.

[mandi_]

Gli "orsi" sono coraggiosi ed hanno grinta. Vedrai che ce la farai a vincere la tua battaglia. Non cambiare niente di te stesso, sei in gamba. Auguri di cuore, veramente.
Mandi con amicizia

[Nona Picia]

Tien duro Orso! Che te ghe la farà de sicuro. Qua a Trieste semo in tanti che ghe chiederemo per ti un aiutin al Padreterno!

[sum culex]

Mi te go fato i auguri anche de un'altra parte, ma te li fazo anche de qua! Se te ga voia de scriverne e de scoltarne vol dir (me ripeto) che te ghe la ga za fata!
Gavemo un'amica che ga avù circa la stesssa malatia un per de ani fa; i la ga operada e la ga fato la chemio. Ben, ogi, la abita circa a 700 Km. lontan de Trieste, la xè vignuda qua con suo marì a trovarne. Questo per dirte che te farà anche ti la stessa roba.
ciao
sum culex

[AdlerTS]

Non xe parole ... spinoso o no te sa che te volemo ben. In bocca al lupo e non mollar.

[macondo]

In boca al lupo, Orso. Son sicuro che te ghe la fará.

[Dolomitiko]

Forza Arnie, non mollare! Conosco una persona che un carcinoma polmonare l'ha avuto 10 anni fa e che da ormai 5 anni ne è fuori!

[babatriestina]

legio pena desso, ma te digo Daghe Orso! prima che i ciapa ste robe, meio xe.. te son forte..

[Ursus Canadiensis]

Grazie a tuti dei auguri e dele parole de incoragiamente. Le xe rivade come la proverbiale "manna" de dio ai Ebrei afamadi.

Ve penso sempre e ve farò saver come che se svolgerà tuta sta eigamarola che me speta.Ciau a tuti, e grazie ancora una volta.

Orso

[babatriestina]

se te pol esser de indicazion, una cugina de una mia cugina che se ga fatto sta primavera una chemio che ghe gaveva dado problemi, adesso la va un giro in montagna

[Nona Picia]

Anche una mia amica in Abruzzo ga avù el tuo problema, i la ga operada, la ga fato chemio e sta estate la xe andada a Fatima e in Israele e adesso la xe qua de noi tranquilla e pacifica.....Andarà tuto ben, te vederà!

[Angiolina]

un abbraccio, Orso

[VetRitter]

lego solo ora, dai Arnie, tien bota sopratuto col cor, e bon che te son "spinoso", cusì te poderà darghela ben al mal..
e se te pol servir una preghiera a chi comanda là in alto no manca..
saludi

[mandi_]

Arnie, se te lezi, sappi che no ne desmenteghem de ti. Te pensem, e spero che i nosi auguri tutti insema, te daga la forza e la grinta per combater e vincer la bataia.
Ciao Orso
Mandi

[nonna ivana]

Arnie, come procede?
Ti pensiamo!

[Ursus Canadiensis]

Grazie Nonna Ivana, meio de quel che pensavo.

Oramai a meza chemioterapia pasada, i me ga fato un TAC scan la setimana scorsa con risultati che me ga sbalordido.

La massa adrenale sinistra xe completamente guarida. Quela destra, che la gaveva oltre setecentimetri e la sanguinava, la xe ridota a due centimetri.

El polmon destro che el jera tocado fin la metà inferiore (cominciando tal punto più baso el xe asolutamente libero del cancro, lasando dolo un area de 2 centimetri che devi ancora guarir. Tuti i liquidi che se gaveva acumulado xe scomparidi in più la ghiandola linfatica sul polmon destro, anche quela parzialmente atacada se ga squasi guarida.

Meo de cusì ...... ben, magari, se gavesi anche podudo no gaver tuto ste rogne..... ma contentemose de dir che no se se podeva spetar. Almeno no son più sula lista de paziednte terminale.

Naturalmente la considerada natura del cancro a cellule picole el pol scatenarse denovo no importa dove, ma se lo gavemo controlado sta volta, speremo de poderlo controlar anche la seconda, almeno per un per de ani.

Grazie per i boni pensieri, muli! Son sicuro che i me ga jutado fin qua.

Orso

[sono piccolo ma crescero]

Felicissimo de sentirte e ancora de più che le robe vadi abastanza ben.

Tien duro.

[mandi_]

No xe niente de meio che svegliarse la matina e sentir bone notizie. Son proprio contenta per ti !Un abbraccio de cor !
Mandi